الخصوصية

اللي بيتخزن عندنا

بنسجّل الطلب نفسه عشان الحساب مع المطعم: المطعم، الأصناف والأسعار، المنطقة، ووقت الطلب. عشان نمنع الطلبات الوهمية بنحتفظ ببصمة مشفّرة (مش الرقم نفسه) لرقم الموبايل ولعنوان الاتصال، ورقم عشوائي للجهاز، وبنمسحهم بعد 90 يوم. مع كل طلب، بنحفظ اسمك ورقم موبايلك بس (مش عنوانك) مشفّرين لمراقبة توصيلة الداخلية — موظف واحد بس يقدر يشوفهم، في لوحة توصيلة نفسها مش عند المحل — وبيتمسحوا بعد 30 يوم من الطلب. ولو المحل شغال بطيارين توصيلة، بنحفظ اسمك ورقمك وعنوانك مشفّرين كمان مع الطلب للطيار اللي يقبله بس، لحد ما يوصّله أو يوم بالكتير (التفاصيل تحت في «طيارين توصيلة على تليجرام»). ولو حجزت دور في عيادة، بنحفظ اسمك ورقم موبايلك مشفّرين للعيادة دي بس، لحد ما يوم الكشف يخلص (التفاصيل تحت في «حجز دور العيادة»). لو ادّيت أكلة طلبتها قلب، بنسجّل إن الطلب ده فيه قلب للأكلة دي (رقم الطلب ورقم الأكلة بس)، وبيتشال لو الطلب اتلغى.

اللي مش بيتخزن عندنا

ملاحظاتك بتتكتب في رسالة واتساب اللي انت بتبعتها بنفسك للمحل من موبايلك، ومش بتوصل لسيرفراتنا. واسمك ورقمك وعنوانك بيروحوا في نفس الرسالة، ومش بنحفظهم غير للطيار، واسمك ورقمك للعيادة اللي حجزت فيها، زي ما مكتوب فوق.

روشتة الصيدلية

لو بعتّ لصيدلية صورة روشتة، بنحفظ الصورة 24 ساعة بس عشان الصيدلية تفتحها من اللينك اللي في رسالتك، ومعاها رقم الجهاز العشوائي وبصمة مشفّرة للاتصال عشان نمنع الإساءة، من غير اسمك ولا رقمك. بعد الـ24 ساعة اللينك بيقف والصورة بتتمسح تلقائي من قاعدة البيانات. اللينك عشوائي ومش بيظهر في محركات البحث. موبايلك بيصغّر الصورة قبل ما تترفع وبيشيل منها البيانات المخفية زي المكان ونوع الموبايل. أسماء الأدوية اللي بتكتبها بتروح في رسالة واتساب بس؛ في الطلب بنسجّل عدد الصور وإن فيه أدوية اتكتبت، من غير أسمائها. النسخ الاحتياطية لقاعدة البيانات ممكن يفضل فيها نسخة لحد 7 أيام قبل ما تتمسح هي كمان.

الطلب المكتوب للجزار

لو كتبت طلبك بنفسك لجزار (النوع والوزن وطريقة التقطيع)، السطور اللي كتبتها بتفضل على موبايلك وبتروح في رسالة واتساب بس. في الطلب بنسجّل إن كان فيه طلب مكتوب، من غير الكلام نفسه.

إشعارات العروض

لو شغّلت «نبهني بالعروض»، بنحفظ العنوان اللي متصفحك بيدّيه لخدمة الإشعارات بتاعته (جوجل أو آبل أو غيرهم) ومفاتيحه، والمنطقة اللي اخترتها، وعدد الإشعارات اللي وصلتك النهارده — من غير اسمك ولا رقمك ولا أي حاجة تانية. بنبعتلك بيها عروض المحلات اللي بتوصّل لمنطقتك، 3 في اليوم بالكتير ومش بالليل. بتتمسح لما تدوس «وقّف إشعارات العروض» تحت في أي صفحة أو «امسح بياناتي»، أو لما خدمة الإشعارات تقول إنها مبقتش شغالة، أو بعد 90 يوم من غير ما تفتح الموقع. النسخ الاحتياطية لقاعدة البيانات ممكن يفضل فيها نسخة لحد 7 أيام قبل ما تتمسح هي كمان.

صورة طلب السوبر ماركت

لو طلبت من سوبر ماركت، موبايلك بيرسم صورة واحدة للسلة — كل منتج بصورته واسمه وعدده، من غير اسمك ولا رقمك ولا عنوانك ولا ملاحظاتك — وبيرفعها وانت في صفحة الدفع، عشان المحل يشوف المنتجات بصورها من لينك في رسالتك. معاها رقم الجهاز العشوائي وبصمة مشفّرة للاتصال عشان نمنع الإساءة. اللينك بيشتغل بس بعد ما الطلب يتسجّل، وبيقف بعد 12 ساعة من رفع الصورة، والصورة بتتمسح تلقائي من قاعدة البيانات؛ ولو ماطلبتش، بتتمسح بعد نص ساعة. اللينك عشوائي ومش بيظهر في محركات البحث. المعاينة اللي واتساب بيعملها في الشات بتفضل في الشات زي أي صورة. النسخ الاحتياطية لقاعدة البيانات ممكن يفضل فيها نسخة لحد 7 أيام.

تقييمك وتعليقك

لو قيّمت محل طلبت منه، بنسجّل النجوم وتعليقك (لو كتبت تعليق) مربوطين بالطلب ده بس، من غير اسمك ولا رقمك. النجوم بتدخل في تقييم المحل على طول؛ والتعليق بيظهر للناس في صفحة المحل بعد ما نراجعه، بالنجوم والشهر بس — من غير اسم ولا منطقة ولا رقم طلب. ماتكتبش في التعليق أرقام تليفونات ولا لينكات ولا أسامي (الموقع بيرفض الأرقام واللينكات). تقدر تعدّل تقييمك أو تمسحه في أي وقت من صفحة المحل على نفس الجهاز، قبل ما تمسح بيانات الجهاز. التعليق اللي بنخفيه بيتمسح نصه بعد 30 يوم، وأي تعليق بيتمسح نصه بعد سنة من كتابته، والنجوم بتفضل من غير نص. النسخ الاحتياطية لقاعدة البيانات ممكن يفضل فيها نسخة لحد 7 أيام.

«اسأل توصيلة»

لو كتبت اللي محتاجه في «اسأل توصيلة»، الكلام ده بيروح لخدمة الذكاء الاصطناعي اللي توصيلة مختاراها (زي Google أو Anthropic أو OpenAI أو غيرهم) عشان تحوّله لقايمة حاجات، وبعدين إحنا بنجيب أسعارها من محلات منطقتك. مابنخزنش كلامك: بنحتفظ 30 يوم بالقايمة اللي رجعت (أسماء الحاجات بس) مربوطة ببصمة مشفّرة للكلام، عشان لو حد سأل نفس السؤال يرجعله على طول. ماتكتبش فيه اسمك ولا رقمك ولا عنوانك.

حجز دور العيادة

دورك في العيادة رقم: بنسجّل اليوم والرقم وحالته ووقته. وعشان العيادة تقدر تكلمك، الحجز بيطلب اسمك ورقم موبايلك: بيتحفظوا متشفّرين (ومفتاح فتحهم مش في قاعدة البيانات)، وبيظهروا لموظفين العيادة دي بس في لوحة التحكم بتاعتهم — مش على شاشة الصالة ولا في أي رسالة — وبيتمسحوا لما كشف اليوم يتقفل أو تلغي حجزك، وفي كل الأحوال بعد يومين من ميعاد الكشف بالكتير. سبب الكشف مش بنسجّله. رابط دورك بيتعمل على موبايلك وإحنا بنحفظ بصمته المشفّرة بس، ومعاه رقم الجهاز العشوائي وبصمة مشفّرة للاتصال عشان نمنع الحجز الوهمي، وبنمسحهم بعد 90 يوم. لو فعّلت «نبهني لما دوري يقرب»، عنوان التنبيه بتاع متصفحك بيتحفظ لحد ما كشف اليوم يتقفل أو تلغي دورك — عشان لو العيادة نادت عليك تاني بعد ما اتكشفت يوصلك — وبيتمسح على طول. الاسم اللي ممكن تكتبه في رسالة الواتساب للعيادة مش بيوصلنا. الرابط بتاعك لوحدك: اللي معاه يقدر يشوف دورك ويلغيه.

تليجرام

لو دوست «تابع دورك على تليجرام»، رابط دورك بيتبعت لبوت توصيلة على تليجرام، وإحنا بنحفظ رقم الشات بتاعك مربوط بالدور ده بس — عشان نبعتلك لما دورك يقرب ولما ينادوا عليك (كل مرة، حتى لو نادوا عليك تاني بعد ما اتكشفت)، ومفيش أي رسالة تانية — وبيتمسحوا لما كشف اليوم يتقفل أو دورك يتلغي. شات سكرتيرة العيادة وقناتها بيتحفظ رقمهم واسمهم على تليجرام لحد ما العيادة تفصلهم. تليجرام نفسه بيشوف الرسايل دي زي أي رسالة عليه. لو قفلت البوت بنمسح ربطك على طول.

طيارين توصيلة على تليجرام

لو محل طلب طيار من بوت توصيلة، رسالة الطلب في جروب الطيارين فيها اسم المحل وعنوانه ولوكيشنه والمنطقة اللي الطلب رايح لها ورقم الطلب، ومن غير اسمك ولا رقمك ولا عنوانك خالص. الطيار اللي بيقبل طلبك بس بيوصله في شاته مع البوت اسمك ورقمك وعنوانك وإجمالي الحساب عشان يوصّلك. الطيارين بيسجّلوا نفسهم في البوت برقم تليفونهم، وتوصيلة والمشرفين يقدروا يوقفوا أي طيار. لما المحل يكون شغال بخدمة الطيارين، بنحفظ بياناتك مع الطلب مشفّرة بمفتاح مش موجود في قاعدة البيانات، وسيرفر توصيلة بس هو اللي بيفتحها للطيار اللي ماسك طلبك. بتتمسح من قاعدة البيانات أول ما الطيار يدوس «وصّلت الطلب»، أو لو الطلب اتلغى، أو بعد 24 ساعة بالكتير (والنسخ الاحتياطية لحد 7 أيام)، وبنشيلها من رسالته لما يوصّل أو يحوّل الطلب أو المحل يلغيه أو يغيّره. الرسالة دي بتعدّي على تليجرام (شركة بره مصر) زي أي رسالة عليه، والبوت بيمنع تحويلها أو حفظها، بس الطيار ممكن يكون كتب البيانات أو صوّرها. لو اتسجلت كطيار، بنحفظ رقم حسابك على تليجرام واسمك والرقم اللي بعته بالزرار: بيوصل للمحل اللي هتاخد طلبه، ولمشرف منطقتك لو حوّلت طلب أو المحل طلب طيار غيرك، ولتوصيلة، ومش بيظهر في جروب الطيارين. بيتمسح لما تلغي تسجيلك أو بعد 6 شهور من غير شغل — إلا لو اتوقفت عن الشغل مع توصيلة، فبيفضل لحد ما ترجع. رسالة الجروب كمان فيها المبلغ اللي الطيار هيدفعه للمحل (إجمالي الأصناف بعد أي خصم، وطريقة الدفع لو تحويل، ولو الطلب معاه روشتة أو طلب مكتوب)، وطلبات الطيارين بتتمسح بعد 3 شهور من عملها. ولو انت صاحب محل أو مشرف ربطت تليجرام بتوصيلة، بنحفظ رقم الشات واسمك الأول على تليجرام لحد ما الربط يتفصل. ولو دخلت جروب الطيارين أو طلبت تدخله ومش متسجل، البوت بيكتب اسمك الأول في رسالة التسجيل (في الجروب، أو في شاتك معاه لو طلبت تدخل من اللينك)، ومش بنحفظ عنك أي حاجة.

حجز كرسي في ميكروباص

لما تحجز كرسي، بنسأل عن اسمك ورقم موبايلك عشان السواق يقدر يكلمك: بيتحفظوا متشفّرين (ومفتاح فتحهم مش في قاعدة البيانات)، وبيظهروا لسواق العربية اللي حجزت فيها في شاته مع بوت توصيلة على تليجرام، ولتوصيلة في لوحة التحكم — مش على الرادار ولا لحد تاني — وبيتمسحوا بعد 24 ساعة من الحجز مهما حصل فيه. السواق ممكن يكون كتبهم أو صوّرهم، ورسالته بتعدّي على تليجرام (شركة بره مصر) زي أي رسالة عليه. وبنحفظ رقم الحجز وعدد الكراسي، وبصمة مشفّرة للينك حجزك (اللينك نفسه على موبايلك بس)، ورقم الجهاز العشوائي وبصمة مشفّرة للشبكة عشان نمنع الحجز الوهمي — وبيتمسحوا بعد الرحلة بشهر. رقم السواق بيظهرلك انت بس طول ما حجزك شغال. لو دوست «نبهني» بنحفظ عنوان الإشعار لحد ساعة بعد ما الحجز يخلص. توصيلة بتحجز الكرسي بس: السواق هو اللي بيحمّل وبياخد الأجرة.

دليل توصيلة

أرقام المحلات والمكاتب والدكاترة اللي في الدليل بنحطها بموافقة أصحابها. ولما بتدوّر في الدليل أو تفتح نشاط، مش بنسجّل حاجة عنك. لو رقمك أو نشاطك في الدليل وعاوز تشيله أو تصلّحه، ابعتلنا على واتساب من «فيه بيانات غلط؟ قولّنا» في صفحة النشاط، وهنشيله أو نصلّحه.

على جهازك

لو اخترت «احفظ بياناتي»، بتتحفظ على جهازك بس عشان متكتبهاش تاني، ومعاها آخر طلباتك. لو ماخترتهاش، الطلب بيفضل في الصفحة المفتوحة بس لحد ما تقفلها. السلة (الأصناف بس) والقلوب اللي ادّيتها والتقييمات اللي كتبتها وأدوار العيادات اللي حجزتها بيفضلوا على جهازك. تقدر تمسح كل ده في أي وقت من «امسح بياناتي من الجهاز ده» تحت الصفحة.

المطعم

المطعم بيستلم بيانات التوصيل في رسالة واتساب عشان يوصّلك الطلب، وهو المسؤول عنها كبائع.

الكوكيز

بنستخدم تلاتة بس: المنطقة اللي اخترتها، وشكل منيو المطعم (العجلة أو القايمة) لو غيّرته، وإنك ثبّت توصيلة على موبايلك عشان شريط «تثبيت» مايظهرلكش تاني. مفيش إعلانات ولا تتبع.

الحماية

الموقع ورا Cloudflare، وطلب الأوردر بيعدّي على فحص Turnstile ضد البوتات. سجلات الطلبات محفوظة على خوادم Supabase في الاتحاد الأوروبي.